भीती

श्शी...
किती भित भित जगायचं?

पैसे कमावायची भीती
कमावलेले साठवायची भीती
साठवलेले परत मिळवायची भीती

नकार येईल याची भीती
होकार आलाच तर लग्नाची भीती
लग्न झालंच तर टिकण्याची भीती

ठणठणीत असताना रोगांची भीती
रोग झालाच तर पथ्याची भीती
पथ्य पाळुनही सातत्याची भीती

ओळख झाली तर नात्यांची भीती
नातं जुळलंच तर राहण्याची भीती
टिकलंच तर तुटण्याची भीती

थोरा-मोठ्यांची भीती
लहान-छोट्यांची भीती
आपल्या वाढणा-या वयाची भीती

पद मिळवायची भीती
ते शाबूत ठेवायची भीती
त्याच्या जबाबदारीची भीती

सरकारची भीती
पोलिसांची भीती
चोरांची भीती

मनातलं सांगण्याची भीती
सांगितलेलं कळण्याची भीती
कळलेलं वळण्याची भीती

जन्मलो याची भीती
मरण्याची भीती
आणि शेवटी पुनर्जन्माचीही भीती

सगळ्या सगळ्याची भीती
श्शी...
किती भित भित जगायचं?

रेनकोट..

टपटप आवाज
पावसाचा, गारांचा, पागोळ्यांचा..
सुगंधाची उधळण
मातीतून, किटलीतून, शेजारच्या स्वयंपाकघरातून..
मी मात्र गच्चीत
दोरीवरचे कपडे पटापट काढण्यात, चपला आत आणण्यात,
मेणबत्ती शोधून ठेवण्यात.. !

मग शोधाशोध
काडेपेटीची, छत्रीची, रेनकोटची..
हळूच नजर
लाईटकडे, खिडकीतून दिसणार्‍या रस्त्याकडे,
तापत ठेवलेल्या दुधाकडे..

रेनकोट सापडतो !!
मळलेला, फाटलेला, उसवलेला..
त्यावर डाग
चिखलाचे, भिंतींच्या रंगांचे
आणि.....
तिच्या लग्नात तिने हातावर काढलेल्या ओल्या मेंदीचे !!

या सगळ्यापेक्षा मग
भिजलेलंच परवडतं.........

नमस्कार !

नमस्कार ! 'असो' च्या निमित्ताने मला तुम्हाला कवितांव्यतिरिक्तही भेटता, व्यक्त होता येईल असं वाटलं.. म्हणून हा शब्दप्रपंच ! फेसबूक वर खूप दीर्घ लिखाण करणं फारसं सोयीचं नसतं. आणि रोज अशा साईट्स ना धावती भेट देणार्‍यांना शांतपणे वाचता ही येत नाही....मोकळेपणी लिहीन....कविता, लेख, कथा ! काहीही असेल. तितक्याच मोकळेपणी वाचा आणि तशीच मोकळी ढाकळी प्रतिक्रियाही द्या !!! :)
नचिकेत